之前開過個Story想一齊交流有關健身嘅事，當中有幾位朋友問健身需唔需要Personal Trainer（PT）
其實呢個問題都之前都好多人問過
所以我不如直接出個post分享依段有教練下做訓練嘅感受
1. 有時上網學或跟朋友做好多動作都以為自己做得正確，但好多時做極都唔太到位，甚至會不正常地痛。
有經驗嘅教練其實一望就知問題係邊，俾個例子，做shoulder fly 手肘應該點發力先真係做緊個膊，點解有時會痛，不同做背嘅動作係針對邊一部分嘅背肌，而又應該點發力等。
教練能針對不同肌肉提供正確訓練組合，或討論邊一部分嘅肌肉需要特別強化而提供相應嘅訓練，訓練過程又會即時糾正錯誤動作，避免受傷。
2. 我以前經常唔知應該點plan當日嘅訓練，例如Chest Day可以有幾十個動作去練 上中下胸，應該做Push定Pull，次序應該係點都係靠估，根據當日狀態好或唔好，應不應該做個superset / dropset 等。
又或者我有一個健身目標，應該點計劃整個schedule同有咩需要配合，例如飲食，cardio等等。
起初無太多經驗其實就可以同教練偷師，留意自己狀態而教練俾咩Program同提示，好好記錄低。
3. 健身有training partner係一件極好嘅事，可以係有健身經驗嘅朋友，都可以係教練。一來可以互相推動，二來可以幫手做多幾下推近極限，我經常認為每set最後幾下最辛苦先係真正嘅訓練，健身每次只做自己不太辛苦嘅下數或重量，不會有大效果。
我自己偏向教練會Push到我做完每set都想跪係度，但亦因爲教練有經驗，所以就算去到咁盡都係安全，因為佢知道應該點push同有觀察住我嘅狀態。
當然網上或身邊有好多資料可以揾到作參考，都有好多app去教我地去做，點始終每個人嘅身體狀況都唔同， 例如我傷過膊頭同脊骨，有啲動作我唔可以做。又或者我增磅過程中唔想望落太腫，我飲食同訓練又要特別配合。
所以我地要分析邊啲資訊係正確同適合自己，唔肯定就最好問清楚。
我所有嘅分享都只是初級經驗之談，不一定適合你嘅情況，都絕不及教練嘅專業知識，所以一定要謹慎接收。
另外好多人都concern個價錢，市面上有好多不同選擇，大家可以多做功課比較下，因為除咗貴或平之外，真係唔係有執業資格就代表係有質素，因為我都聽過太多中伏分享，有心有教學態度有經驗嘅教練其實係一遇就知，所以問下有join PT session嘅朋友介紹就最直接。
而且我認為有PT嘅training session唔只係單純更有效嘅訓練，而可以當佢係一課教學，要好好留意同紀錄教練每一個指示同問清背後原因，自己都學緊野，咁就更加值回票價。
Search